1000కీ స్తుతులు

1. స్రగ్విణీ, ర, ర, ర, ర యతి 7

దక్షిణా మూర్తి! మా దైవమీవేనయా

రక్షణీయంగనే రాగదే ధాత్రికిన్

శిక్షలే వద్దయా శ్రీకరా నీకృపా

వీక్షణల్ చాలులే! భీతినిం ద్రోలుమా

2. గణనాథ వృత్తము, భ, య, భ, య యతి 7

శంకర సుతా ! నీ సన్నిధిని జేరన్

జంకితిని రావా సజ్జన సుపోషా !

యింకయును మాపై యీ యలక లేలా

సంకట వినాశా స్వామి దయనిమ్మా

3. ఖచరప్లుతము 34 43 న భ భ మ స స వ యతి 12

ధరణిఁ మోయు మహా బల నాగేంద్రా హరి తల్పమువైతివే

పరుగుతో జనుచుండగ దారిన్ ప్రాకెడి నిన్ను స్పృశించినన్ 

సరగు కాటును వేయక దీవింౘన్ దయ చూపగ కోరెదన్  

తరము ముందుకు సాగుట కై సంతానపు భాగ్యమునీయుమా

4. పంచ చామరము జ ర జ ర జ గ యతి 10 

నదీమ తల్లి గంగ నాథ! నంది వాహనా భవా

సదా శివా యనుగ్రహమ్ము చాలు నాదిదేవుడా 

ముదాన నిమ్ము శంకరా తపో ధనమ్ము పొంద నీ

పదంపు నీడ వేడినాము భక్త వత్సలా హరా

5. వాణీ వృత్తము, 146 మ భ న న య న గ 10

అమ్మా నీ నామము దలచు నపుడును మా మానసమునన్

గ్రమ్మే చీకట్లను గని యలుగకు భవానీ నయముగన్

రమ్మా భూ లోకమునకు సరగున కపర్థీ సతి! సదా

నమ్మేమమ్మా నిను మనమున విడువక గొల్చేము! హిమజా

119 చంపకమాలి భ మ స గ 7

శ్రీ రఘు రామా! యాశ్రిత పోషా

శూర! కిషోరా! హే సుర పూజ్యా

భారము నీదే! పావన నామా

చేరిక నిమ్మా యో స్మిత రూపా

6. 36 96 ప్రియవచనము న య మ గ 7

జనక సుతా భాస్వత్సచ్ఛీలా

వని కనియున్ విధ్వంసశ్రేణిన్

వినుత గుణాఢ్యా విశ్వాసంబున్

వనజ ! యిడమ్మా వాత్సల్యమ్మున్

7. మృత్యుంజయ వృత్తము, త, మ, ల గ గణములు, యతి లేదు

శ్రీ ఆంజనేయా చిన్నదౌ

ప్రాయంబునే పూర్ణమ్ముగన్

వ్రాయించినావే బ్రహ్మ తో

నీయాయు రేఖన్! దేవరా

8. . మేదురదన్తమ్ (కిరీట వృత్తము), భ, భ, భ, భ, భ, భ, భ, భ యతి 13

మానిని! మా కడ లోపములెంచకు 

మా! నిను గొల్చెడి వేళల యందున

మానసమందున యిద్ధరి లో గల మాయని బాధల దల్చుట గాంచుచు!

మానవ జాతికి నైజము శోకము  మానక యుండుట యేనని తల్లిగ

తేనెల పల్కుల చిల్కుచు బాధల  దీర్చుచు జ్ఞానమొసంగుమ శాంభవి

9. సావిత్రీ వృత్తము మ, మ గణములు యతి లేదు

మాణిక్యమ్మౌ విద్యా

రాణీ శర్వాణీ హే

వీణా పాణీ తల్లీ 

వేణీ జ్ఞానమ్మిమ్మా

10. 180 మణిరంగము ర స స గ 6

కింక లేలనొ కేశవ పుత్రా

పంకజోద్భవ బ్రహ్మ! సదా మా

వంక జూడుమ! ప్రాణ ప్రదాతా

శంక లేలనయ సన్నిధినిమ్మా