1.
అయ్య వారి నింట అణువు బ్రహ్మ జనించె
అచ్చ తెనుఁగు బిడ్డ! అమిత జ్ఞాని
వందనంబు లిడరె ప్రజల కొఱకు పాటు
పడిన నాయకునకు! పౌరులార!
2.
తెనుఁగు జాతి కీర్తి దేశమంతయు చాటి
అణువు శక్తి తోడ నవసరముల
దీర్చి మేలు జేసితివి జనులకు నెల్ల
సాంబశివుడ నీదు శక్తి ఘనము
3.
కాంతి కిరణములను కల్ప తఱువు వోలె
జనులకు నొసగేను శాస్త్ర వేత్త
మఱువ వలదు వారి మంచి గుణములను!
ప్రణతులిడరె భరత ప్రజలు! మీరు
4.
కనివిని యెఱుఁగని రీతిన
జనులకు హితమగు సరళిన సాంకేతితతో
కనుగొని కాంతిని వెలుగుల
మనముల నింపిన శివుడకు మంగళమనరే
5.
యిలను తఱచి జూడ నెందరో మనుజులు
పరుల హితము కోరు వారు కరవు
వెన్ను పోటు కైన వెఱవకుండ నిలచి!
జనుల గాచెనితడు! సాంబశివుడు
6.
సాంబశివుండు సజ్జనుఁడు! శాస్త్రము లెన్నియొ నేర్చికూడ యే
డంబము లేని యుత్తముడు! డబ్బును డాబును గోఱలేదు తా
నంబరమంటి నేత! తన యక్షర విద్యను సత్యసంధుఁడై
కంబము నూది బంచెనని గౌరవ రీతిన సత్కరించరే
కంబము = శంఖము
7 వ పద్యము
భరత జాతి నందు విరిసిన పద్మము!
జనుల కొఱకు తనదు శాస్త్ర విద్య
ధార పోసి వెలిగె తార వోలె నిలను!
చల్లనయ్య మనకు సాంబశివుడు
No comments:
Post a Comment